संविधानसभा निर्वाचन बहिस्कारका कमाण्डर महानगरका मेयरका उम्मेदवार

काठमाडौँ । २०७० सालको संविधानसभाको दोस्रो निर्वाचनका बेला गोर्कीप्रसाद श्रेष्ठ निर्वाचनलाई बहिष्कार गर्दै मतदानमा सहभागी भएनन् । त्यतिबेला श्रेष्ठले आफू मात्र होइन अरूलाई समेत सहभागी नहुन भन्दै सक्रियतापूर्वक निर्वाचन बहिष्कार गरेका थिए ।

काठमाडौं महानगरपालिकाको मेयर र उपमेयरमा उम्मेदवारी दर्ता गर्दै नेकपा क्रान्तिकारी माओवादीका प्रत्यासी गोर्कीप्रसाद श्रेष्ठ र सावित्री खरेल । तस्बिर : राजधानी

मोहन वैद्य नेतृत्वको नेकपा (क्रान्तिकारी माओवादी) तत्कालीन नेकपा–माओवादीले संविधानसभा निर्वाचन बहिष्कार गरेसँगै उनी पनि निर्वाचनको प्रतिरोधमा उत्रिए । तिनै श्रेष्ठले ३१ वैशाखमा हुने स्थानीय तहको निर्वाचनका काठमाडौं महानगरपालिकाको मेयर पदमा उम्मेदवारी दर्ता गराएका छन् ।

क्रान्तिकारी माओवादीका केन्द्रीय सल्लाहकारसमेत रहेका श्रेष्ठले पार्टीको चुनावी मोर्चा देशभक्त जनगणतान्त्रिक मोर्चाका तर्फबाट स्वतन्त्र रूपमा मेयरका लागि मनोनयन दर्ता गरेका हुन् । उनीसँगै पार्टीका तर्फबाट काठमाडौं महानगरपालिकाको उपमेयरका लागि सावित्री खरेलले मनोनयन दर्ता गराएकी छन् ।

दोस्रो संविधानसभा निर्वाचन बहिष्कारका लागि उनी काठमाडौंमा खटिएकी थिइन् । उनलाई पार्टीले अमर आदर्श स्कुल मतदान केन्द्रलाई केन्द्रमा राखेर निर्वाचन विरोधी गतिविधि र निर्वाचन बिथोल्नका लागि नेतृत्व दिएको थियो ।

‘हामीले यसपटक निर्वाचनलाई उपयोग गर्दै जाने निर्णय गरेका छौं,’ उनले भनिन्, ‘त्यसैले पनि निर्वाचनमा सहभागी भएर जनतासँग विकासका गतिविधिमा सहभागी हुन उम्मेदवारी दिएका हौं ।’ उनले निर्वाचन बहिष्कार गर्दा प्रश्न गर्नेहरू अहिले निर्वाचनमा सहभागी हुँदासमेत प्रश्न उठाइरहेको भन्दै आश्चर्य व्यक्त गरिन् ।

संविधानसभाको दोस्रो निर्वाचन अन्तरिम संविधानको मर्मविपरीत भएका कारण बहिष्कार गरेको बताउँदै मेयरका उम्मेदवार श्रेष्ठले स्थानीय तहको निर्वाचनमा विकासका लागि सहभागी भएको बताए । ‘हामी विकास विरोधी होइनौं, हामीले जनतासँग जोडिएर जनताका जीवनस्तर सुधार गर्नका लागि निर्वाचनमा सहभागी हुँदै छौं,’ उनले भने ।

उनीहरूसँगै भरतपुर महानगरपालिकामा क्रान्तिकारी माओवादीको चुनावी मोर्चा देशभक्त जनगणतान्त्रिक मोर्चा (देजमो) का तर्फबाट अम्बिका मुडवरीले मनोनयन दर्ता गरेकी छन् । देजमोको केन्द्रीय सचिवालय सदस्यसमेत रहेकी मुडवरी २०७० सालको संविधानसभाको निर्वाचनमा चितवन जिल्लाको जिल्ला सह–इन्चार्ज थिइन् । अहिले आफूहरू विकास र जनतासँग जोडिनका लागि निर्वाचनमा होमिएको उनले राजधानीसँग बताइन् । ‘यसको मतलव हामीले आफैंले जलाएको संविधान मान्यौं भन्ने होइन, उनले भनिन्, ‘स्थानीय तहको निर्वाचन विकाससँग जोडिएकाले क्रान्तिकारी उपयोग गर्ने भनेका हौं ।’

क्रान्तिकारी माओवादीका तर्फबाट उपत्यकाको अर्को महानगरपालिका ललितपुर महानगरपालिकाको मेयरमा विजय खड्गी, उपमेयरमा इन्दिरा अधिकारीले उम्मेदवारी दिएका छन् । त्यस्तै, पोखरा लेखनाथ महानगरपालिकामा भीमबहादुर श्रीसले मेयर र कल्पना थापाले उपमेयरमा उम्मेदवारी दिएका छन् ।

निर्वाचन आयोगमा क्रान्तिकारी माओवादी दर्ता छैन । आयोगले निर्वाचन चिह्न नदिएपछि पार्टीले सबै तहमा स्वतन्त्र रूपमा उम्मेदवार खडा गरेको हो ।

राजधानी दैनिकबाट सभार

Loading...